Tres d'aquella mesa taba l'inspector Xil Xardón, un funcionariu gordu que s'arrequexaba ente montoneres de papelorios. Yera un conocíu de facía tiempu, de cuando trabayaba na policía, y como siempre, fui a contrastar información.
- ¿pero entós nun pues dicime na más?
- amira, Fonseca, nun tenemos más nada. Esi home apaició muertu nun cuartu zarráu con un ferronazu na tiesta, l'autopsia nun dio drogues más qu'un pocu d'alcohol y l'ángulu d'entrada de la bala ye inclináu, taba mirando pal cañón. Esi matóse, Fonseca, nun-y des más vueltes.
- home, Xardón, y qué me dices de les botes, una puesta y otra non. Tarás d'alcuerdu que nun ye vezu dexar una bota puesta pa dase un tiru.
- pero nun hai móvil, nun faltaben perres, taba too n'orde, y esa muyer declaró que nun sintió nada aquella nueche, ye más, les alarmes taben activaes. Si encates asesín piensa entós en femenín porque tenía que tar dientro la casa, o l'ama o la roxa, pero a ver cómo despliques la sala trancada per dientro y la pólvora na mano del muertu.
Ruxó'l teléfonu y Xardón entamó falar d'otru casu. Dexé morrer la charra aquella llevantándome y colando con un sescudíu de la tiesta p'amosar el mio conforme con él. De momentu nun pudía sacar más qu'aquella ruina información, pero'l mio instintu glayábame a les oreyes que botes marielles hai mui poques y menos con tantes perres como aquelles. Los resclavos del asesín teníen que siguir nel cuartu del crime y la clienta nun taba contando tola verdá.
Prestoso abondo. Ye una pena que namái espublices cada tantu tiempu.
ResponderEliminar